50 Johr Frauestimmrächt. 50 Johr (schier) Glyychberächtigung. Das hed sich allwääg der Basler Gsundhäitsdiräkter gsäit, won är im stille Chämmerli bschlosse hed, as d Schnitzelbänkler nit dörfen im Fäärnseh ufdrätte. Drumm hed dä gschniigled Maa sy Assischdäntyn (Glyychberächtigung?) füregschickt. Sii sell em gmäine Volck dä doch zimmlig apsunderlig Entschäid verdütte. Wohrschyynlig hed der Gsundhäitsdiräkter scho gwüsst, as druufaabe über der guete Frau es Gwitter usbricht. Aber, so nimm ich emoll aa, hed sich der Scheff vo allne Chranken und Gebrächlige gsäit: Glyychberächtigung gülted nit numme bii Schöönwätter.
Nääbenyyne. D Schnitzelbänkler dörfe jetz doch singe. Der Gsundhäitsdirekter hed noochegee. Er will jo letschtamänt wiider gwehlt wäärde.
schier = beinahe
apsunderlig = absonderlich
verdütte = erklären
letschtamänt = schliesslich
