Begeegnigszone

Z Sissech gits e Begeegnigszone. Dört begeegne sich allergattig Fuerwäärch. Groossi Bänne. Chlyyni Gutsche. Schnälli und nit so schnälli Göppel. Dracktöör mit und ohni Güllewaage. Wello mit und Wello ohni Liecht. Trottinett, alli ohni Liecht. Der Böschtler mit em Elektrodöffli und em Boschtwäägeli, wo im Zügs ummeschlänggeret, will der Böschtler allwewyyl im Schuss isch. Laschtwääge, wo emene Gwärbler s Grien liifere. Soo isch jeede Daag es Riisigsghürscht in deere Begeegnigszone. Ou. Fascht hätt ich s vergässe. Fuessgänger hets au no in all däm Gnuusch. As die nit underäinisch under e Draktoor chömme, hed me jetz in der Begeegnigszone zwee (provisorischi) Schwelle montiert. Soo müese d Auti langsaamer fahre und d Fuessgänger chömmen ungschoren über d Strooss. In der Begeegnigszone. Wo d Fuessgänger jo Voordritt hätte. Äigedlig.

Güllewaage = Jauchewagen
schlänggere = hin und her schwingen
Grien = Kies
Ghürtsch und Gnuusch = Durcheinander

In Basler Zeitung veröffentlicht | Kommentieren