Mitemene Lift opsi und nidsi fahre isch jo für gwöhnlig nit son e Gschicht. De stohsch mit e baar Frömden in der Kabyyne, säisch käis Wort, brobiersch niemer aazlugen und luegsch, as de schlöinigscht wiider uusechunnsch. E chly anderscht gohts im Lift im Kantonspidaal z Lieschtel zue und hääre. Jeeden und jeedi, syge das Dökter, Schweschtere, Paziänten oder Bsuecher, wo zue- oder usstyyge, sääge grüessi oder adie. Vor lutter Grüesse bisch amme richtig froh, as de glyy chönnsch usstyyge. Ganz schlimm wirds, wenn den in oberschte Stock vom Spittel muesch fahre. Bis dört oobe hesch öbbe 21 Mool grüessi und 43 Mool adie gsäit. Bisch äntlig aachoo, bisch froh, wenn dir e hilfsberäiti Chrankeschweschter d Schwäissdröpfli vo der Stiirne buzt.
opsi = aufwärts
nidsi = abwärts
schlöinig = sofort, so schnell als möglich
Spittel = Spital
