As zum voorewägg klar isch: Ich ha weeder es Chatzebuuseli non e Hund. Was ich mi aber immer wiider froog: Was darf äigedlig es Chatzebüüseli und was darf e Wouwou? Oder anderscht umme gfroggt: Was weeri, wenn das, wo die ströinende Büüsi mache, au d Hünd würde mache? Zum Byspill d Äidächsli und Blindschlyyche im Garte blooge, bis sy eeläändig verrecke. In d Löiemüüli schysse oder underäinisch in der Chuchi stönde und sich hinder d Lachsbröötli mache. Wohrschyynlig würd das alles ufhöre, wenn d Chatzehalter das müesste mache, was d Hundehalter scho lenger müese – nämmlig ihri Büüseli beufsichtige. No han ich d Hoffnig nit ufgeh, as so noodisnoo alli fremde Chatze us mym Garte verschwinde und ich d Blindschlyyche im Ganze, und nit in vier Stück verchätschd, cha beobachte.
Chatzebuuseli = Katze
voorewägg = im Voraus
