S Brüelerhemmli

Mängisch mues me fascht 60 Joor warte, bis me das gschänkcht überchunnt, wo me scho lang druf blanget hed. Scho sit iich e chlyyne Bueb bii han iich miir nämmlig das gwünscht, won iich as Wynechtsgschänkch überchoo haa. Nüt verruckts, aber öbbis, wo jeede ufrächte Sissecher Faasnächtler äifach mues haa.
E liebi Fründyyn vo myner Frau hed miir es gattligs Brüelerhemmli gschänkcht.
Jä, was chäibs isch jetz aber es Brüelerhemmli? Aso: Soones Hemmli hed men aa, wenn z Sissech am Faasnechts-Dunnschtig s Chluuri verbrennt wird. (Doo no äinisch für alli: me säit nit der, daas oder sünscht öbbis kurligs, me säits äifsch s Chluuri. Will die, wo son es Hemmli aahäi und wääred em Druurmarsch uf d Allmed aabe brüele, säit me däm Gwand Brüelerhemmli.
Jetz gits aber dere und dere Hemmli. Es git Faasnächtler, die ryyse churz vor der Chluuriverbrennig es Lyynduech füre und machen es Loch dryy, soo, as d Larve duure basst. Anderi – es sy allewyyl öbbe die glyyche – sueche wie gstört churz vor Verbrennig iires wysse Gwand. Und: wie allewyyl lyts nöimen imene Egge im Glyyge-Chäller, dört, wo sys im Joor voorhäär aanegheit häi. Immer no glyych dräkchig und verrumpfled. Denn gits dere Brüeler, won es olts Barched-Lyynduech vo der Grossmueter über Schultere schlöie und s vorne mit der Blagette zäämemache. So äine bin iich gsii. Will das chäibe Duech immer verrütschd isch, biin iich all baar Meter drufstschalpped. Vo usse hed das denn allwääg usgsee, as hätt iich äin in der Chroone. No der Chluuriverbrennig hed das Hemmli albe usgsee, as wer iich mitere Sou duur e Rüebacher gschnooged. My Frau hed denn mys Lyynduech immer wiider suuber brocht, schön gletted und im Faasnechtschaschte versoorggt. Schlussemänd ischs es olts Eerpstück gsii vonere Groossbääsi.
Die won iich immer bewunderet haa, sy die, won es moodischs gattlig zäämegnäits Brüelerhemmli aaghaa häi. Mäischtens sy das Fraue gsii, wo halt wüsse wie me mitere Näimaschiine z schlaag chunnt. Wenn iich mys myggerige Hemmli aagluegt haa, sy miir amme d Drääne choo – was jo im Zäämehang mit der Chluuribeäärtigung gar nit so schlächt isch.
Woorschyynlig hed d Fründyyn vo myner Frau Beduure ghaa mit miir. Sii hed miir nämmlig es wunderschööns Brüelerhemmli gschnyydered, as nummen esoo e Gattig macht. Und numme s Bescht Materiaal isch guet gnueg gsii. S fyyne Duech hed sii allwääg vonere Fellache Frau ghaa und der Stäärnlifaade isch vonere Noochfaarin vo den Inca uf emen Wäbbstuel us Jak-Chnoche gwoobe worde.
Also: Setted diir hüür an d Chluriverbrennig choo, liebe Läserinne und Lääser, iich bii dä hinder rächts mit em schöönschte Brüelerhemmli wyttumme.