Das isch d Strooff, hed amme der Groossvatter gsäit, wenn men nit uf die Groosse loost. Guet, grad immer ischs allwääg au nit gscheit, wenn me das macht, was die Alte sääge. Aber e Wiiderveräinung welle duurestiere, won e Groossdäil vo de Baaselbieter umsverwoorgge nid hed welle, isch halt fascht e chlyy wie bolitische Sälbschtmord. Jetz häi die Grüene der Salaat. Sii sy am letschte Wuchenändi soumeessig ghübled worde. S Stimmvolch – ämmel die wo gweelt häi – häinene gottströöfflig d Hüener yydoo. Jetz stönde sii doo mit apsaggte Hoosebäi. Ebe. Das chunnt dervoo, wenn me nit uf die Groosse loost.
umsverwoorgge = unbedingt
hüble = strafen
gottströöfflig = sträflich
