Das isch prezyys das, was der Noldi vom Chlöpfgatterhoof so fuchsdöifeslwild macht. Wenn er so Sache wie das vo der Baaselbieter Glyychstelligs-Kommissioon mues lääse. Es git se zwaar, die Kommissioon, aber niemer wäiss so richtig, was die äigedlig mache. Die vo däm Schlooffchappe-Kchundoor selle doch emool uf sym Hoof cho verbyyluege. Bii iim schaffi nämmlig e junge Polin. Die welli nüt vo Glyychberächtigung wüsse. Die chrampfi der lieb lang Daag. Do mües är luege, as iim au no e Chue zum Mälche blyybi. Wenn är den amme noo der Aarped äis oder zwöi Brenz neemi, döig dä dunners Draguuner au nit hinderhaa und döigi glyychberächtigt mitlüttere. Däm säägi är Glyychberächtigung – nundefaane!
fuchsdöifelswild = sehr zornig
Kchundoor = Büro
Brenz = Schnaps
Draguuner = energische Frau
