Jessesmaryyaa, häi die dä aarm Kärli duur d Brässi gloo. Alles häi die Radio-, Fäärnsee- und Zyttigslüt an der Brässekonferänz vom letschte Meentig vom nöie Dräiner vom FCB welle wüsse. Fascht wie usemene suure Lääderöpfel häi sy s letscht Dröpfli us däm aarme Maa wellen uusebrässe. Wie mängisch as er syni Zeecheneegel schnydi? Öb er Chlääbischue oder deere zum Binde häigi? Öb er wüssi, was s «Nunnefirzli» syygi – aargg, er hets nit gwüsst! Öb er s glyych Hoorband dräägi wie der Streller? Über daas und non e huffen anderi wichtigi Sache hed dä Maa us Portugal stundelang müesen Uskumft gee. Nummen öbbis wäis iich noonig: Dräit er jetz barchigi oder lyynigi Underhoose – aber woorschynlig isch das au gar nit esoo wichtig.
jessesmaryyaa = o weh
aargg = schlimm
