Noodäm d SP letschti Zytt an der Urne immer öbben ufs Dach überchoo hed, nääme sich jetz d Jumpfere vo de Baaselbieter JUSO de wichtige Sachen aa. Sii reege sich drüber uuf und häi fascht e chly gstämpferled derbyy, as z Lieschtel an Banndaag käini Fraue dörfe. Sii verlange, as sii s neecher Joor au derbyy syy. Rächt häi sii, die ufmüpfige Wyybervölcher. Daas syy die woore Brobleem, wo miir häi. IIch fröi mii ämmel scho, wenn denn die jungi Düpfi mit Begyyne, emene Schnitzsack und ere Voorderladerflinte z Lieschtel duurs Stedtli schuene. Aber woorschyynlig sy die Frölläin au geege s Banndaagsschiesse.
glyychergattig = gleichartig
Begyyne = Frauenhäubchen der Baselbieter Tracht
Schnitzsack = bunter Tuchbeutel der Baselbieter Tracht
