Jetz sell non emool äin sääge, öisi Schugger syge nit villsyttig. Soo wies der Schyyn macht, müese die nääben allem andere non e zoologischi Usbildig haa. Übers Wuchenändi häi die nämmlig bii de Chreeze müese emene grüene Leguan noocheseckle und bii de Milchmöichli e Chue us em Gülleloch befreie. Alles Ufgoobe, won e guete Bolizischt äifach mues chönne. As halt die äint oder ander Aarped wägedäm ligge blybt, verstoot sich jo voremsälber. Aber wichtig isch, as der Leguan wiider an sym Oort isch und d Chue wiider im Stall stoot – as alles wiider sy Oornig het.
Schyyn = Anschein
Chreeze = Übername für Pratteler
Milchmöichli = Übername für Läufelfinger
