Iich ha Ruundääfeli gschänkt überchoo. Näi, iich will jetz nit joomere, as die Dääfeli nümm z Gälterchinde gmacht wäärde und e Zürchere bim Ummerüere iiri Finger drinn hed. Näi. Mii hed Wunder gnoo, wievill Ruun s äigedlig in deere Baaselbier-Spezialideet hed. Iich ha lang müese suechen und has denn schlussemänd doch no uusegfunde. Nääben e Huffen anderem, won iich gar nit gwüsst haa, as das brucht, hets uf 200 Gramm Dääfi prezyys äi Prozänt «Rahmpulver» drinn. Nit as sy nit guet weere. Näi. Numme isch der Namme nit richtig. Die müeste doch äigedlig «Rahmpulver»-Dääfi häisse. Und jetz wäiss iich au, worum me bi öis «Der Ruun oobenap schöpfe» säit. Scho no apgschlaageni Chäibe, die Zürcher!
Ruun = Rahm
der Ruun oobenap schöpfe = das Beste für sich behalten
