Das isch miir in Sinn choo, won iich ghört haa, as die vo der «TagesWoche» bii de Abonnämänts-Zaalen e chlyy bschisse häige. Halt e chlyy Bschysshünd, wo allwääg dänkt häi, es cheemi nit uus. Aber iich cha d Schryyberling, wo gmäint häi, sii häige d Schlööiji mit em Suppelöffel gässe, berueige. Vor iine hets scho vill Schlööijeri gee – nämmli d Metzger. Wenn de nämmlig dreivierlig Schooffs-Voorässe gchauft hesch, hed d Metzgersfrau bim Apwääge no mit iirem dicke Duumen uf d Woogschaale dooped und gfroggt: «Darfs es bizzeli mee syy?» Wenn scho bschysse, denn z grächtem.
dreivierlig = 375 Gramm
Voorässe = Ragout
