Do letschti han iich Doomate für es «Chutney» yygchocht. Der Chrampf derbyy isch aber nit s Schelle, s Chäärnli uusemachen oder s Fyynhacke gsii. Näi. Das chan iich jo nit so schlächt. E hueremeesiige Hunderei isch öbbis ganz anders gsii. D Yymachgleeser, wo d Frau im Chäller schöön aanebyygelet hed, häi mii schuurig gschluucht. E Däil vo deene häi nämmlig non en alti Etigette druff ghaa. Aso iich sääg öich: In deere Zytt, won iich die chäibe Zeedeli vo de Gleeser gchnüüblet haa, hätsch guet und gärn chönnen e Donne Baredyys-Öpfel überdue. Bis denn die chlääbrige Chlööpe wiider suuber gsii syy, hätsch grad no äinisch chönnen e Schübel Doomaten yychoche. Iich wünsch däm oder deere, wo dä Lyym erfunde hed, falls sii sette vo myym «Chutney» ässe, ghöörig der Dürlischletzer. Jowoll!
Hunderei = gross Anstrenung
Dürlischletzer = Durchfall
