Immer öbbe zwüschenyyne mache mir im Durne bsunders apsunderligi Üebige. Doo häi miir doch letschti Durnstund mit somene «Thera-Band» müesen uumerfuerwärche. Under de Bäi duuren und hinden am Ruggen aabe. Derbyy hesch immer müesen Achtig gee, as diir das Gummiband nit an d Chürpse gschnättered isch. As nächschti Üebig häi miir das Band um beedi Bäi müese lyyren und zäämechnüpple. Soo syy miir denn duur d Durnhalle gjoggled. Aber, es isch wie allewyyl. Wo myyni Koleege nämmlig scho lang am Dusche gsii syy, han iich iimer no brobiert, dr Chnüppel vo myym «Thera-Band» uufzdue.
Dr Daag druuf han iich denn äin vo myyne Durngspöönli im Dorff droffe. Er hed miir äin aanegjoomerd, wien är doch «Muskelkater» häigi in de Bäi. Gspässig. Miir häi numme d Chlöbbe wee doo.
schnättere = schnellen lassen
lyyre = wickeln
