Dr root Deppech

Jo. Jetz mäined diir sicher, iich well öich öbbis vomene roote Deppech verzelle, wo men uusrollt, wenn souwichtigi Politiker uus em Ussland zu öis in d Schwyz chömme. Oder wär wäiss, velicht chunnt äinisch der Baabscht uf Sissech. Und denn syy mir froo, wenns nöime son e Deppech hed, won e Gattig macht. Oder diir dänked an e roote Deppech z Hollywood oder süscht nöimen amenen apsunderligen Oort.
Näi. Nüt so dummlächts Züüg.
Diir müessed nämmlig gaar nit so wytt sueche. Gönged äinisch über d Holzbrugg, wo bii der Chlyynen Allmed über d Ärgolz goot. Dört häi d Wärchhoofarbeiter e Deppech gläit, won e schuurigi Gattig macht – fascht ebe wie z Hollywood. Über dä Deppech stäägeren aber käini apgmaagerete Gschüüch mit Stöcklischue. Die würde nämmlig emänd mit iire spitzige Schueabsätz non es Loch in daas voornääm Boodeduech mache. Für settigi Däämli isch dä Deppech nämmlig vill z schaad. Er isch au nit für e Baabscht. Setts denn dä würklig äinisch uf Sissech verschloo, pföödeled dä allwääg eender dur d Begeegniszoone – halt denn dört ooni roote Deppeech. Und wär wäiss, velicht hed denn dr Becker im Strichcode wiider e chlyy Broot fürig. Will d Strooss wääge däm höche Bsuech natüürlig wiider apgsperrt isch und iim daas wiider äinisch niemer gsäit hed. Er chönnti denn s fürig Broot, wie daas scho zu Zyte vom Scheff vom Baabscht gmacht worden isch, an die Arme verdäile.
Halt. Jetz bin iich zimmlig verchoo. Daas han iich äigedlig gaar nit welle verzelle. Aber äinewääg. Guet häi miir drüber greedet. Au wenn s Gchaar und s Grumoor in dr berueigte Zoone für e Däil es roots Duech isch. Aber mir wäi jo nit bääbschtlicher syy as dr Baabscht – mäinti!
Chömme miir doch aber zrugg zue de wichtige Sachen im Lääbe – zum roote Deppech.
Es isch halt schon es anders über d Brugg Laufen as früener. Halt scho fascht es Schwääbe. S git jo Lüt, wo ganz süüferlig über d Brugg düüsselen und uufbasse, as sii dr Deepech nit dräckig mache. Halt läider nit alli. S git ebe duraane Söiniggel, wo ooni d Schue apzputze, über dä fyyn Deppech schuene. Ganz schlimm ischs, wenn d Wandergruppe Ringelsogge mit Schöllen an de Wanderschue über das Boodeduech chruckled. Wenn die amme duure syy, gseets uus, wie wenn e Buur mit em Mischtzettler duure weeri. S goot allwääg nümm lang und me mues e Verbottsdaafele für settige Wandersüchel aanestelle. Und no öbbis anders isch miir uufgfalle. Doo letschti heds mii nämmlig dunkt, as dr Fischräier, wo ammen im Bach unde stoot, ganz nyydig uufeschiiled. Ich chaa dä arm Voogel au ganz guet verstoo. Käi Deppech und die ganz Zyt im Nasse stoo. Dä wird miir au efangen e zümpftigi Gsüchti haa. Aber lieber e Räier mit Gsüchti as Wanderer mit dräckige Schue.
Aber döie miir nümm wytter joomere und häi äifach Fröid an däm gattlige, roote Deppech. Und dänked draa, wenn dir äinisch setted drüber laufe. Bitte d Schue apbutze. Danke!