Mit groossen Auge luegd mii s Noochbers Mäitli aa und säit: «Waas, dir häit käi magnetischi Chüelschrankdüre»? Iich schüttle der Chopf und froog s Jümpferli, für waas denn die Dür bartu setti magnetisch syy? Die Chlyyi wird ganz gitzlig und lax mäint sii: Aber au. Wo aane iich denn d Zeedeli für d Flöötestund, s Ballett, s Mukidurne, die verschiidene Stundeblään hänki, wenn iich käi magnetischi Chüelschrankdüre häigi? Iich haa lang überläit, was iich jetzt däm Mäitli sell sääge. Es isch miir aber nüt Gschyyds in Sinn choo. Waas miir jetz aber e chlyy Angscht macht, isch nit daas, as mir käi magnetischi Chüelschrankdüre häi. Vill mee git mir nämmlig z dänke, as Noocbersmäitli allwääg mäint, ich giengi no ins Ballett. Ich glaub, iich muess mit däm Frölläin emmol z grächtlige reede.
gitzlig = ungeduldig
lax = nachsichtig
