Scho chäibe wunderfitzig, son e Spatz. De sitzisch gmüetlig bim Nachtässen und chöisch amene zümftige Flängge Suppefläisch umme. Will scho d Groosmuetter gsäit hed, Fläisch ooni Broot syygi e Sünd, nimmsch halt in Gotts Naamen und em Friide z lieb e Schyybe Broot zum Fläisch. Und daas wäiss allwääg dä Spatz. Glyy heds nämmlig e huffe Bröösmeli uuf em Disch. Dr Spatz fliegt süüferlig aane, luegd äim fräch aa, däbbeled uf em Disch ummen und spanyyfled uf d Brootbröösmeli. Ich maag iim die Bröösmeli jo gönne. Waas iich aber nit so pfundig find, isch, as er biim Drvoofliege jeedesmool e Voogeldräck loot lo gheie. Wie chunnt daas au no uuse, wenn nit emool me d Spatzen Aastand häi!
wunderfitzig = neugierig
spanyyfle = begierig Ausschau halten
