Dr Noochbersbueb hed do letschti ganz druurig zue mir gsäit, jetz häig er müesse, will er d Uufgoobe nit gmacht häigi, e Strooffuufgoob schryybe. Guet esoo, han ich dänkt. Will dr Gotthelf hed jo scho gsäit: «Im Hause muss beginnen, was leuchten soll im Vaterland».
Jetz nimmt mii aber numme wunder, was die Damen und Herre Landrööt für e Ströfzgi überchömme. Die häi jo, lut Zyttig, immer no föifhundert Gschäft, wo sii noonig behandlet, oder besser gsäit, uf die langi Bank gschoobe häi.
Wenn sii dernoo iiri Aarped gmacht häi, chönne sii denn immer no afoo lüüchte. Und settis nit zum Lüüchte läänge, chönne sii jo emool afoo mit Motte.
Ströfzgi = Strafaufgabe
motte = glimmen
