Wenn ich alben in dr Stadt bii, gluur ich gäärn bi de verschiidene Metzgerei in d Monteren yyne. Doo bin ich do letschti aber soumeessig verschrocke. Ich haa mir d Auge griibe, will ich gmäint haa, ich luege in e Blaschtiglaaden yyne.
Dr Schwartemaage, s gröicht Utter, die gkochte Schwyynsfüessli, d Bluet- und Lääberwürscht: Alles isch schöön gattlig in Blaschtig yypackt gsii. Vacumiert, wie me hütt säit. Klyynisch suuber. Alles wunderbaar uusgrichted und byygeled. Numme, so richtig aamächelig heds halt äifach nit uusgsee.
Bi däm ville Blaschtig feelti äigedlig numme no, as d Laadetochter hinder em Laadetisch e Latexaazug aa hed.
gluure = angestrengt schauen
Montere = Schaufenster
