Si hed mi au gringgled – d Süüch. Aber ich will nit chlaage.
Ich bi jo woorschyynlig nit dr äinzig, wos ins Näscht ghaue hed.
Wenn dä so doo lyysch und vor die aane fieberisch, bisch jo so gottefroo für jede guet gmäinte Root, wo de überchunnsch.
Ziibele-, Quark- oder Häärdöpfelwiggel. Essigsogge. Hüenersuppe. Bruschttee. Süttig häisse Holdersyyrup. Tröpfli, uus Bengalische Graaniumblätter. Warme Rotwyy oder Chütteneschnaps. Häissi Milch mit Hoonig. D Bruscht yyryybe mit chinesischem Hundsschmutz und non e huffe mee chächs Züüg.
Jetz isch halt numme schaad, as son e Süüch nummen öbben e Wuche duured. Das längt jo hinden und voorfer nit, all das gsunde Dockterzüüg uus z brööble.
Aber käi Angscht. Die nöchschti Süüch chunnt, wies Amen in dr Chille.
gringgled = geschüttelt
süttig = siedend
chächs = gesundes
Dockterzüüg = Arzneimittel
