Ich hätts jo selle wüsse. Derbyy hani dr Frau numme welle gon en Eermelschuurz boschte.
Doo bini aber in es Wäschpinäscht yynegroote.
Uusverchauf!
Es isch zuegange wie im Himmel voruss.
E Tschuppele Byysszange häi sich wäägen e baar aabegschriibene Goorsett fascht d Chöpf yygschlaage. Die Tschuuri häi im Züügs ummegnüelt wie Verruckti. Aso, mi heds e chlyy gmaant wien e Horde Wildsöi, won es Mäisfääld umgraabe. D Hüft- und Büschtehalter syy nummen esoo duur d Luft gflooge. Syy häi enand d Sachen uus de Chlööppe grissen und enand aagäitschd. Es isch buffed, grämpled und gchrääbled worde. Äini hed sogaar schon e chlyy zum Muul uusgschuumed. Dr Gäifer isch ere, wo si son e Underrock eneren andere hed chönnen uus de Chröiel rysse, zu de Muuleggen uusegloffe.
Und zwüschedrinn – ich!
Derbyy han ich gar käis Goorsett bruucht. Und nääbenyyne: Myy Frau au nit.
Eermelschuurz = Am Rücken zugeknöpfter Ärmelschurz
Bysszange = keifende Frau
Tschuuri = närrische Frau
