Chnuppere

Isch jetz d Faasnecht öppis Luschtigs oder halt doch eender öppisch Ärnschts? Miir wäi emool luege. Nääme mer as Byspiil e chlyyni Gruppe, wo schone baar Joor z Sissech Faasnecht macht. Und luegen emool, was es bruucht, bis sii alles zääme häi.
D Süschee-Sitzig: S Schwiirigscht isch nit, es Süschee z finde. Näi. S Verzwicktisch isch, e Daag z finde, wo alli Zytt häi. Wenn denn äntlig alli binenander hocke, es Bier drinken und glatti Sieche syy, bruucht s albe schones Zyttli, bis jeede wäiss, worum er äigedlig doo hockt. Wenn denn äin säit, me bruuchti nones Süschee, luegen alli zeerscht emool enander aa. Jeede hofft, der ander häig e zündendi Idee. So nach em fümfte Bier hed denn alben dochno äin en Idee. Velicht nit grad e zündendi, aber äinewääg, besser as e Schnapsidee.
S Goschtüüm: Wichtig isch doo, ass men e Schnyydere mit Näärve wie Drootsäil hed. Sii chauft der Stoff yy. Nämmlig so vill, ass käin an der Faasnecht mit den Underhoose mues mitlaufe. Sii blaant also. Uf s Blaane chömme mer denn wytter unde no äinisch zrugg. Näärve bruucht si aber nit bim Schnyydere. Daas chaa si jo. E Huffe Näärve bruucht si, bis si jeedem der Umfang gmässe hed. S isch verruckt. Au noch em dritte Mool mässen isch der Ranzen immer no glyych grooss. He nu so denn!
D Laarffe: Joo, die bruucht s halt in Gottsnaamen au. Früeijer hed me die no sälber yygläit. Iich wäiss, es git immer none baar Faasnechtsgruppe, wo das mache. Me goot aso ines Laarffe-Atelier und loot sich vom Künschtler lo beroote. Er luegt d Chöpf vo de Faasnächtler aa, öb s klassischi Faasnechtsgrinder syy, und entschäided denn, weeli Laarffen as em beschte druuf basst.
D Faarp vo der Berügge: Das isch die nööchschti groossi Entschäidig und denn, wie d Laarffe sell aagmoolt wäärde. Dir gseejed: Es bruucht e Huffe Kumpidänz.
Wäägelibou: Jetz chömme d Handwäärcher zum Zug. Es wiird dischgeriert, dischbidiert und zwüscheduren öppen es Bier gnoo. Wie lenger as gschnured wiird, wiird s Wäägeli alsbott gröösser.
Bis äine säit, dänked draa, miir müese denn dä Chaare no zue der Dür uus bringe. Soo goot der eerscht und denn der zwöit Samschtig verbyy, ooni ass öppis Gscheits uusechoo weer. Daas haani oobedraa mit blaane gmeint! Denn goot s aber zgrächtem loos. Es wiird gschrubt, boort, ghämmered, gsagt, ass d Spöön fliege.
Numme ganz eläi imen Egge stoot en alte Maa und verliist Schruube. Chrüzschruube zu Chrüzschruuben und Schlitzschruube zu…ebe! Soo hed halt jeeden in der Gruppe syy Uufgoob.
Und underäinisch, nach öppen em sibte Samschtig, stoot es gattligs Wäägeli doo, und alli häi Fröid. Au dää, wo d Schruube verlääse hed.
Umzug: Döört schläiffsch denn das Kunschtwäärch zwüschen e Huffe Lüt dure, schwitzisch under der Laarffen und hesch s Muul voll Komfetti, wones Chind vo der Strooss uufglääse hed.
Nach em Umzug nimmsch es Bier und goosch häi – oder esoo!
Soo, jetz chönned diir sälber entschäide, öb d Faasnecht öppis Luschtigs isch.

chnuppere – werkeln
Kumpidänz – Kompetenz