D SBB schloot wieder einisch uf. Nit grad, aber glyy und süüferlig. Mir nämmen emol aa, as dä Ufschlaag nüt mit em Läufelfingerli z due het.
Jetz wird sicher alles besser.
Zum Byspill die soumessig modärne Sitz in der 1. Klass in dene hüper modärne Regionalzüüg «Flirt». Uf dene chunnsch dir jo vor, wie uf ämene Byychtstuehl us em 15. Joorhundert. Im Summer, wenn dä schwitzisch wien ä früschgrupfte Lämmergeier, hesch bim Usstsyge s Gfüehl, die Stabälle blyybe dir am Rugge chlääbe. Überhaubt d1. Klass. Dä zahlsch zwar s Doppläti, aber d Yrichtig wird alsfot eifacher. Ä huffe Technik, aber wenig chummlig.
Do loob ich mir dr «Saalewyydli-Express», wo am Morge früei uf Basel tschätteret. Alti Wääge, wo zwar ä chly chläppere, komoodi Sässel, wo dä drinn versinksch wien ä König. S Bescht vo allem isch aber, d Zuugsdüüre gönge zue, ohni as dr Kondiktöör muess wien ä Halbwilden an dä Düürfallen ummerriigle.
Läufelfingerli = stark defizitäre Zugskomposition
Stabälle = Stuhl
chummlig = bequem
