Rächt heit dir. Au mir im Baselbiet wäschen eus nümme vorussen am Brunndroog. Hütte wäscht höchschtens no dr Buur s Milchgschirr oder d Häärtöpfel, won är bruucht zum dr Chäärtschtler z brennen im Brunne.
Derbyy häts ohni Zwyyfel au ä baar Voortäil, wenn dä dr Mölli immer no chönntisch vorussen am Brunne wäsche. Wenn nämmlig öbbis nääbenuusegöitschet, müesstisch nochhär keis Gschyss mache bim noocheglänze vom Chromstahl und dä Duschibläättli.
Hütte schläiffsch di jo doodmüed us der Duschkabine. Nit will die s Dusche gschluucht hätti. S Nochedrööchne vo jedem einzelne Wasserdropfe macht die so z schwitze, as dä grad wider sowyt wersch, ä nöiji Duschi z nee. Will dä weisch, as die d Frau gruusig zämmestuucht, wenn dä d Chachle nit suuber butzisch, machsch in dr Duschkabine die verrücktischte Verränkige, as jo keini Sprützer an d Wand git.
Chäärschtler = Kartoffelbranntwein
göitsche = planschen, spritzen
