S Groosi hett scho gseit: Choschts nütt, ischs nütt wäärt.
Zu sällere Zytt hett män aber fürs Gäld non ä huffen abedytligi Sachen überchoo. Äs saaftigs Chueutter, wo d Grosmueter dehei für ä Grosätti süferlig paniert het. Fyyngschnitteni Schwyynsöörli und –schnöörli für d Äärpssuppe. Suurrüeben und Duurlips, oder für ä bsundrigen Aalass, ä gattlige Güggelchambe zum Fülle.
Hüttig z Daag boschtisch d Byppibei scho fertig paniert. So merksch dehei weniger, was für än usgmergläte Schäichen as dä gchaufft hesch. D Hüehner säärple nöimen im ene Chinesische Hinderhoof vor sich aane. Vor luuter blutte Huehnerfüüdle weisch bi denen aarme Vyycher nit, was voornefer und was hindefer isch. Aber das spiilt alles kei Rolle, wichtig isch, s Fleisch isch günschtig.
Suurrüebe = Weisse Rübe
Duurlips = Runkelrübe
Güggelchambe = Hahnenkamm
