Dä hesch di juschtemänt gsäädlet und fröijsch di uf ä gueti Guttere Wyy, do foot dä Schuelmäischter wysewyy afo schwaafle, was är alles vom Wyy versteechi. Dähei, im vollklimatisierte Gwöölbchäller, heigi är schliesslich öbbe zweeduusig Flääsche Wyy – numme vom Beschte.
Ich brobier äifach nit aanezloose, aber dr önologisch Schnuurepflütteri bapplet fräch wytter.
Är chönn numme scho an dr Faarb vom Wyy aa sääge, öbbs ä Wyss- oder ä Rotwyy syygi. Bim Deguschtiere gspüüri är dutzwyyt, vo weeler Räbzyyle und sogar vo weelem Räbstock dr Wyy chömmi. Är schmöcki im Wyy sogaar, wenn ä brünschtigi Wildsou an d Drüübel brünzlet heigi.
Je länger dä Braschticheib vor sich aane schnöört, chunnt mir mi Wyy, won ich vor mir haa, vor, as schmöcki är wien ä Gumpi suure Ranzechlemmer. Broscht zämme.
Schuelmäischter = Besserwisser
juschtemänt = eben gerade
Schnuurepflütteri = Schwatzsucht