Wenn me nit doo isch, chaa me – zum Byspiil – dört syy. Me chaa aber au, au wenn me doo isch, glyych ewägg syy. Und denn chaa me no, wenn me äigedlig setti doo, besser gsäit dört syy, nöimen anders syy. Ummen nit dört, wo men äigedlig setti syy.
Doorum han iich mii gfroggt: Woo isch äigedlig letscht Wuchen öise Baaselbieter Nationalroot uus Brattele gsii? Wie me nämmlig hed chönne lääse, isch är biim Stimme z Bärn oobe öbbe „abwesend“ gsii. Guet. Er isch sicher nöime gsii, umme nit dört, won är äigedlig hätti selle syy. Aber wär wäiss: Velicht isch äine, wo nit dört isch, glyych doo – oder halt denn nöimen anderscht.
umme = nur
stimme = abstimmen