S isch e Rung gange, aber jetz häi glaub öisi äidgenössische Dänkmoolschützer dr Rank doch no gfunde. Noom die gfitzte Frauen und Manne fascht bii jeeder Solaraalaag, wo uuf emen alte Huusdach hätt selle mondiert wäärde, es häilooses Gschyss apgloo häi, syy sii jetz allwääg doch gschyyder worde.
Jetz häi sii nämmlig d Finger druff, as käis vo deenen Atomchraftwärch, wo miir denn äinisch velicht nümm bruche, apgrisse wird.
Und wo sii rächt häi, die Scheffbeamte z Bärn oobe, doo häi sii rächt. Schlussemäänd gseet es stillgläits Atomchraftwärch allewyyl no besser uus, as so ungattligi „Kollektore“ uuf de Huusdächer. Guet. D Dänkmoolschützer müese sich jo au käini Gedanke mache, wohäär as dr Stroom und s Liecht chömme. Für daas hets z Bärn jo anderi.
Rung = Augenblick
Noom = nach dem
