Blööd syy d Römer jo nit gsii. Syy häi – nääben em Chriegerle – e huffe Gschyyds, erfunde. Eben au d Wachsdaafele. Es isch sicher nit immer äifach gsii, uuf deene gaagligen und schliifrige Daafele gattlig z schryybe. Aber für daas häi die jo bsundrigi Schryyberling ghaa. Wenn die nämmlig e Säich gschriibe häi, hed me die – nit wie hütt – äifach de Löie zum Frässen aanegheit.
An daas han iich müese dänke, won iich wiider emool dusse glääge bii und mir der Wind d Zyttig uus de Chlöbbe gchutted hed. Es weeri emänd gaar nit schlächt, me würdi wiider afoo uuf Wachsdaafele z schryybe. Soo würds äim nit bii jeedem Windstooss d Zyttig dervoowääie, und zwöitens – aber iich glaub, daas mit de Löie löie miir lieber blyybe.
gaaglig = wackelig
dervoowääie = davon wehen
