Wenn isch e Bahnhoof e Bahnhoof? Und wenn isch e Bahnhoof käi Bahnhoof me? Die Froog stellt me sich z Sissech, wo ap em Wyymooned s Räisezentrum dichtmacht. Byleet gits ap denn nummen no am Automat. Und. Wenn d Huldi will ihres Köfferli ufgeh, bidüted daas, as sy uf Lieschtel mues. Das wird denn en übelzyttigi Räis. Denn nämmlig, wenn sy duurs halb Dorf krucklet isch und dernoo no mit em Rollator mues in Zuug yystyyge. Aber es git sicher Lüt, wo ihre hälfe. Mensche, wo no Zuug fahre, obwohl s für die grosse Dänker vo der SBB wohrschyynlig äifacher weeri, sy chönnte d Züg ganz ohni Passagier lo ummefahre.
Wyymooned = Oktober
übelzyttig = mühsam
