Das hed my Frau scho vor 40 Johr gwüsst. Was? He daas, wo d Auschtralier jetz uusegfunde häi. E Studie vo der University of Queensland säit nämmlig, ass Manne mit Bäärt die bessere Langzyttpartner syy. Für die mäischte Fraue sy gattrasierti Schnöörewaagner mit Gsichter wie früschbuudereti Chinderfüdle unryyfi Gaalaffe. Höchschtens z bruuche für e churzi Affäre oder e One-Nite-Stand, wie men uf guet Baselbieterdütsch säit. Soo. Jetz rooted emool, was ich haa. Richtig. E Baart.
Schnöörewaagner = dumme Schwätzer
Gaalaff = junger, geckenhafter Mann
