Stäärnechäib, isch daas die letscht Wuchen es Gechaarschtel gsii. Und e Läärm wäägen es bitzeli Schnee. Soo wies uusgseht, hed jeeden und jeedi en äigeni Schneeschnützi oder e Schneefreesi dehäi. Ganzi Völkerstämm in dicke Tschööppen und wullige Chappe häi mit ihre hochmodärne, stinkige und läärmige Schnütz- und Freesmaschiine das Schüümli Schnee uf em Vorblatz ewäggbutzt. Derbyy hets amme fascht e chlyy Eergger geh, will der äint em andere der Schnee uf sy Voorblatz entsoorggt hed, wo scho fyynsüüberlig gschnützt gsii isch. Der Daag druuf hets in Schnee gsäicht, die wyyssi Bracht isch gschmulzen und es isch wiider Ruei gsii im Doorff – ämmel mit de Schnütz- und Freesmaschiine.
chaarschtle = schippen mit viel Lärm
schnütze = Schneeräumen
