Joo, der Film «S’Gheimnis vo Ammel» vo der Cynthia Coray häig iim no gfalle, hed miir der Migger vom Schoorchäänel-Hoof noo der Brömiere brichted. Bsunders der Hauptdaarsteller, der Paul Schaffner, häig iin beyydrukcht. Das syg halt schon e dunners Chätzer. Weeniger Fröid häig der Migger an deere Heerejumpfere ghaa, wo alli voorgstellt hed, wo im Film mitgmacht häi. Die sygi uf der Büni ummegstäägered, wien en ufgschüüchte Grauräigel. Und häig glyych närvöös doo, wie albe syni Hüener döie, wenn der Hüenerwei welli e Gluggere hoole. Daas zäigt, as halt nit jeeden Import us der Stadt ufs Land basst.
Heerejumpfere = Fräulein aus der Stadt
ummestäägere = sich mit steifen Beinen bewegen
Räigel = Reiher
Hüenerwei = Habicht
