Iich ha bis jetz gmäint, das geechi gar nit. Jetz häi doch z Kanada ääne scho die längscht Zytt die beschte Fraue gschutted und häi esoo doo, as hätte sii nüt bigryffe. Hejoo. Jetz wird doch äini in somene Schuttispiil vonere bläiche Stiigele vo de Bäi ghoolt und die gheit der langewääg uf d Matte. Die Spiilere stoot aber äifach wiider uf, ooni sich minutelang wien e Schweerverletzten uf em Raase z waale und schutted wytter. Jä stäärnechäib. Het die denn nüt vo de Manne gleert? Und s Schlimmscht an allem – die Chreeze hed jo nit emool es Tattoo ghaa.
bigryffe = begreifen
Stiigele = dünne, grossgewachsene Frau
waale = wälzen
Chreeze = bemitleidenswerte Frau
