Aso näi. Alli hacken uf em Regierigsroot Wüthrich umme und machen iin zum Böölimma. Nit numme die vo den andere Barteie. Näi. Jetz duet iim au no d Barteifründyn Nebiker d Hüener yy. Derbyy hed sich doch dä yygwandereti Ämmedaaler die letschte zwölf Joor e huffe Müei gee. Er hed sich under anderem mit bokchbäinige Leerer, apghoobene Kulturheinis oder wältfrömde Schuelpsycholoogen ummegschlaage. An de mäischten Apéro, won er amsthalber hed müese derbyy syy, hed er alles gee, as nit zvill Häppli zrugg in d Chuchi gönge. Und s Bescht chunnt zum Schluss – jetz häi sii iim no d Ränte gkchürzt. S würd mii nit wundere, wenn dä guet Maa am nächschte Sissecher Suppedaag mitere Milchchanne aadanzt, as är syy Famile cha duurebringe.
Böölimaa = diir chönned ussueche zwüsche: 1. Drohfigur gegen ungezogen, freche Kinder oder 2. von innen beleuchtete, ausgehöhlte Runkelrübe
