S chunnt guet. Chuum sy d Wienechtschugele versoorggt, hange scho die erschte Waalblakaat mit Frauen und Manne, wo äim aaspienzle. Und wie allewyyl verspräche sii öbbis, wo nach de Waale mäischtens scho glyy wiider vergässe goot. Äi Bartei mäints hüür bsunders guet mit miir: sii kchämpft für my Freihäit. Jeede Daag. Fyyrtig und Sunndig. Vierezwänzg Stunde lang. Dank deene dapfere Freihäitskchämpfer wäiss iich jetz, as iich die letschte 60 Joor woorschyynlig yyglocht gsii bii. Aber jetz wäi die mii – freen, wie sii emol syy – uus em Loch uusehoole. So nach em Motto: «Mehr Freiheit – weniger Staat». Guet, so ganz ooni Staat denn scho nit. Letschtamänt zaalts s Sitzigsgäld, wenn sii denn emool gweelt sy, brezyys, der Staat.
spienzle = verlangend anschauen
yyloche = gefangen nehmen
freen = gutherzig
letschtamänt = schliesslich
