Äntlig. Uf daas han iich scho lang gwaardet. Näi, nit as der Embolo yybürgert worden isch – är isch jo schlussemänd numme Baasler worde. Vill wichtiger isch, as bii de Biirestiil e badänti Jumpferen äntlig sälbergmachti Hundegutzi verchauft. As es klaar isch, sii macht Gutzi für und nit Gutzi us Hünd. Aber nit äifach numme hundsgwöönligi Gutzi. Näi. Die Hundechröömli sy no gluetefrei. Iich wäiss nit, öb die gueti Frau uf d Wienecht aane au no Äänisbröötli für d Wouwoueli bacht. Iich würd dervoo aproote. Es chönnt nämmlig bassiere, as somene Fluumer es Äänissöömli in de Zeenli blybt stecke. Und so vill as iich wäiss, gits no käini «Hundezahnstocher», zum däm aarme Hündli das Söömli us der «Zahnlucke» z chnüüble.
Biirestiil = Übername für die Bewohner von Diegten
badänt = tüchtig
Chröömli = Kekse
Fluumer = langhaariger, kleiner Hund
