Duurlips und Chinder

Ganz süüferlig isch der Noldi vom Chlöpfgatterhoof am zwölfi umme mit sym alte «Hürlimann»-Traktoor Richtig Sissecher Nussgipfelbrugg (Bischofsteinbrücke) apbooge. Er isch uf em Wääg gsii zum Köbi vom Dräckholdehoof. Hinden uf em Brüügiwaage hed er es Fueder Duurlips glaade ghaa, wo der Köbi bruucht hed für syyne Chüe z fuere.
Wo der Noldi em Schuelhuus zue ghötterled isch, isch iim uufgfalle, wien e Huffen Auti dört ummenander stönde. Bii de mäischten isch no der Modoor aa gsii. Er isch mit sym Gspann uf e Schuelhuusblatz gfaare, wils iin wunder gnoo hed, was Chäibs do loos isch.
Chuum isch er ap em Traktoor aabegchlääderet, isch e jungs Düpfi us äim vo dene Schlitten uf iin zuegschosse – ooni der Modoor apzstelle. Denn hed die Gumslen iin schuurig afo zääme schyysse: «He diir! Häit diir nüt Gschyyders z due, as mit öichem gfeerlige Faarzüüg und däm stinkige Züüg hindedruff doo aane z faare? Häit diir nit gsee, ass es doo e Huffe Chinder hed?» Der Noldi isch zäämegfaaren und hed vergelschtered ummegluegt. Die Byysszangen isch iim voorchoo wie sys Röösli. Die duet nämmlig prezyys glyych, wenn er e chly spoot us em Rössli häichunnt.
Noodäm er sich e chlyy erhoolt gha hed, bluuschtered er sich uuf und säit zue däm Ryybyyse, ass er aanefaar, won er well. Schlussemänd syg er vor ville Joor doo emol in d Schuel gange – numme häigs sälbetsmool noonig so vill Auti ghaa. Doo isch die Chleechue aber erscht richtig reechelig worde. Das inträssieri sii ä Dräck, gäitscht sii. «Miir syy doo, wil miir öisi Chinder wäi vo der Schuel aphoole.»
In der Zwüschezytt sy non e baar anderi Fraue derzue gloffe. Der Noldi isch sich e chlyy voorchoo, wien e Güggel imene Huffe vo gaggernde Hüener. Der ganz Huffe hed afo durenander bälitschiere, und d Chinder, wo tschuppelwyys us der Schuel choo syy, häi d Müüler und d Augen uufgspeerrt.
Jetz hed der Noldi aber der Chambe gstellt. E grad deerewääg hed er sich nit welle lo sänkle. Schlussemänd hed er nüt Verbottnigs gmacht und käin vo dene woolbehüedete Goofen überfaare. Noodäm d Aafüerere hed müese Luft hoole, hed er zimmlig lut gfroggt: «Han iich rächt ghört? Diir hooled öichi Chinder mit em Auti ap?» Öb denn die käi Zytt häige, z Fuess häi z lauffe? Mit deere Froog isch er aber an die Falsche choo. Jetz isch s Kommeedi erscht rächt loos gange. «Häiwääg? Z Fuess?», hed en äini vo deene Fraue, wo ume Noldi gstande sy, unglöibig gfroggt. Öb er denn no nit gmerkt häig, wie gfeerligg as es efang uf de Stroosse mit däm ville Vercheer syyg. Doo chönn me doch emene Chind nit zuemuete, z Fuess in d Schuel z goo. Der Noldi hed numme der Chopf gschüttled und denn gsäit: «Aber gueti Frau. Wenn diir jeede Daag hii und häär faaret, machet diir doch au Vercheer.» Jetz häi die Frauen enand nummen no verdattered aagluget.
Äis vo de Chinder hed denn no welle wüsse: «Mami, was hed dä Maa äigedlig auf syym Aahänger?» D Mueter von em hed iires Gööfli an der Hand packt und der Noldi hed numme no ghöört wie sii säit: «Wäiss iich au nit. Daas luege miir denn dehäi im Internet. Styyg jetz yy!»