Jetz isch der Noldi vom Chlöpfgatterhoof aber zümftig zunderopsi. Das Gstürm wäge deere «Ecopop»-Sach miechi iin halber duubedänzig, hed er zwüsche zwee Burgermäischterli vor sich aanebrummled. Er versteechi jo, as in der Schwyz nit alsfott mee Lüt verdräägi. Schlussemänd dörfi är sy Hüenerstall au nit graagled voll mit Hüener haa. Dorum findi ärs numme richtig, as me nit z vill Frömdi in d Schwyz leechi. Jetz chiemen aber usgrächnet die vo der SVP und mende, as me die «Ecopop»-Sach sell aplääne. Jetz breedige die doch scho joorelang, as me nit z vill Ussländer in d Schwyz setti yyneloo. Und jetz underäinisch gülted das nümme. Do chiem doch käi Sou me druus, hed der Noldi gcholdered und non e Schnaps gnoo.
zunderopsi = durcheinander
duubedänzig = verrückt
graagled voll = übervoll
