Heerlig. Es gits se no – Hamperchsmanne wo bim Schaffe pfyffe. Aber es chunnt no besser. De guet Maa isch jeede Moorgge am halber achti vor der Düre gstande. Daas zur Zyttt – drei Wuche lang. Und wien er gschafft hed. Hoorgenau hed er jeede Stäägedritt yynebasst. Klaar. Schlussemänd hed de Maa wo öisi Wändelstääge nöi gmacht hed au Wändelspiess ghäisse. Daas hed jo numme chönne gute uusechoo. Nummen äinisch hets es chlyy Fysymadänte gee. Denn, won iich e Chlöpfer ha welle z Nacht ässe und miir myy Frau schuurig d Hüener yydoo hed: «Die Wurscht ghört nit dyyn. Die isch für s Znüüni vom Herr Wändelspiess.» Jetz isch d Stäge fertig und d Chlöpfer ghööre wiider miir.
Hamperchsmaa = Handwerker
D Hüener yydue = zusammenstauchen
