Jetz sell miir käine choo und sääge, das syygi scho immer esoo gsii. Iich mag mii nämmlig no bsinne, as me sich dusse hed chönnen uuf e Liggstuel aanepflätteren und d Zyttig lääse. Aber sitt emene Zyttli isch daas nümm mööglig. Jeeden Oobe chuttets äim d Zyttig uus de Dööppe. De chunnsch der voor, as wersch nöimen ufere Hallig im Oschtfriesische Wattemeer. S feelti si numme no, as der e Tschuppele Ringelgäns über e Chopf fliegen und e Vogeldräck löie lo gheie. Daas weeri denn no s Düpfli ufs i, oder besser gsäit, s Bölleli in der Zyttig.
Struubel = heftiger Sturm
aanepflättere = hinlümmeln
