Schöön isch s gsii bii de Waadtländer. Der See hed glitzered und d Sunne hed oobenaabe bräägled, as äim der Schwäiss uus allne Löcher driibe hed. Um äim umme syy d Räbstöck gstande, äin umen anderen uufgräit wie in der Achtigstellig. Will miir e chlyy uusglächned gsii syy, syy miir in Bäiz undere Sunneschirm ghockt und häi e halbe Wysse bstellt. Und jetz chunnts! Wüssed diir, waas öis s Frölläin empfoole hed: e Wyssen uus Italie. Daas zmitts in de Chasselas-Rääbe. Wyy, wo hed müese vo Italie doo aane gchaart wärde. Nöimeduure lauft doch doo öbbis lätz – oder waas meendet diir?
verstuunt = erstaunt sein
uusglächned = am Verdursten
