Äifach, as wiider äinisch gsäit isch. Wäärend z Baasel die mäischte no im noochfaasnächtliche Delirium glääge syy, ischs z Sissech no äinisch zur Sach gange. Am Dunnschtig Zoobe häi miir, und daas scho sitt fascht achtzg Joor, s Chluri verbrennt. Bii öis goot halt alles e chlyy lenger – au d Faasnecht. Woorschyynlig will miir halt non e chlyy mee Spöiz in de Chnoche häi und nit nach drei Dääg Drummle, Pfyffe und Schränze halber oomächtig ins Bettwäärch gheie. Und no öbbis mues an deere Stell – au daas nit s erscht Mool – gsäit syy: Me säit s Chluri und nit wien e Däil Stedter dr Chluri. Soo, jetz weeri daas au wiider äinisch gsäit.
Spöiz = Saft und Kraft
Bettwäärch = Bettzeug
