Äigedlig duet diir nüt wee. Aber äinewääg gosch äinisch under em Joor dyyni Zeen go zäige. Dört grübled diir denn es nätts Fröilläin – e Dentalhygienikere – im Muul ummenander. Sii chratzt und schlyyft an dyyne Zeen umme, as den Angscht muesch haa, es blyybe numme non e baar myggerigi Milchzeenli für.
Wenn d Jumpfere denn fertig isch mit Drangseliere und de lääbig drvoo choo bisch, duet diir denn zerscht emool e baar Dääg s Muul wee.
Und denn chunnts. Wenn de wiider chönnsch wäärschafts Ässe zue diir nee, foots Unhäil aa.
Es blybt diir underäinisch Züüg zwüsche de Zeen bhange, wo de früener käini Lücke ghaa hesch. Aso iich ha albe s Gfüel, as miir nach em erschte Reedli Salami e ganzi italiänischi «Salumeria» zwüsche de Zeen syg blyybe hange.
myggerig = dürftig
drangseliere = quälen
