D Choscht

Zwüschenyyne mues me jo au ässe und nit numme schryybe. Soo goots miir ämmel im Momänt. Iich darf nämmlig für es Zyttli mit de Schryyberling vo der Volksstimm uuf der Readktion zääme syy. Und iich sääg öich, daas isch denn nit nümme nüt. Doo goot e Fuure. Es wird vill dänkt, deelifooniert, dischgeriert, in PC yynegluegt und gschriibe.
Und wie gsäit: Wäär vill schafft, mues zwüschenyyne au öbbis haabere.
Will nit immer gnueg Zytt isch, blybt me zum Ässe uuf dr Redaktion und goot nit häi oder in e Bäiz. Doo han iich aber Auge gmacht, wo d Redakter und Praktikante mit iire „Tupperware“gschiir, Suppemuchle, Blaschtighääfe und Seechtbecki yygloffe syy. Es miir fascht e chlyy voor cho, wie uufemene Chachelimäärt. Aber richtig struub ischs worde, won iich gsee haa, waas die zum Ässe byysich ghaa häi. Der äint hed vo dehäi der Räschte vo de Büchseravioli mitbrocht. Die hed er schöön süüferlig uuf e Däller byygelet und se denn im Mikrowällenoofe warm gemacht. Vo wyttem hed daas no chäibe aamächelig uusgsee. Won iich aber nööcher bi go aaneluege, heds mii scho dunkt, s Ganz gseech eenter e chlyy wien es Schlachtfäld uus – numme halt mit griibenem Chees drüber! Äi Redaktionsjumpfere hed zimmlig luschtloos imene Joghurt ummeglöfflet und zwüscheduure uuf d Ravioli gschiilt. Wär wäiss. Velicht hätt sii e Mümpfel dervoo welle.
Denn gits deere, wo ins Konsi gönge und dört e öbbis für die gschnälli Chuchi boschte. Zum Byspiil e fertig zäämegmischte Salaat mitere Salaatsoosse uus em Blaschtiggüüggli. Gäärn gässe wäärden au fertigaagmachti Saläät. Und s Bescht isch, s Bsteck uus Blaschtig isch au graad derbyy. Soo fallt s läidig Apwäsche au graad ewägg. Die groossi kulinarischi Uuseforderig isch aber, im Mikrowällenoofe e Cheesburger, no im „Cellophan“güggli warm z mache. Daas isch denn es Luege. In der Weermi bluschtereds nämmlig daas Güüggli uuf, fascht wien e überzwäärchi Bluetwurscht. Wenn denn daas soumeessig gluschtige Kunschtwäärch gnueg häiss isch, nimmt mes uuse und stüpft dryy, as d Luft uusegoot. Die ganzi Herrlichkäit ghäit denn in sich zääme und soo schmöckts au. Bim druufbyysse – ooni „Celophan“ – hesch nämmligs s Gfüel, as de ufemene lätschige Baadeschwumm ummechöisch. Mit em Underschiid, as uuf em däm käi gschmulzene Chees het.
Natüürlig wird au drunke. Mäischtens Mineralwasser. Me mus jo as Redakter e klaare Chopf bhalte, nit as underäinisch non e Blöödsinn in der Zyttig stuchti.
Äin, non e chlyy e junge Schnuufer hed sich aber e chlyy e Soumoode aagwöönt. Will dä allwääg dehäi käi Zytt zum Zmoorggenässe hed drinkt er fascht jeede Daag e halbe Liter „Schokodrink“ uuf der Readktion. Guet, drinken isch nit ganz richtig gsäit. De sürflet denn der halb Moorgge an dem Züüg umme, wien wenn es Chalb dränkt wurdi.
Aber sünscht gfallts miir uuf der Redaktion.