Miir häi jo alli d Waal-Zyttig vo dr SVP überchoo. Iich ha die ganzi Zyttig vo hinde bis füre duureglääse. Wie sichs halt für e richtige Schwyzer ghöört. Won iich duure gsii bii mit Lääse, biin iich schon e chlyy vergelschtered gsii. Biin iich jetz e richtige Schwyzer, e halbe Schwyzer oder emänd gaar käi Schwyzer? Ganz duuränand haan iich no äinisch die erscht Sytte vom däm Blatt aagluegt und bii zimmlig verschrocke. Nundefaane. Die, wo in die Zyttig gschriibe häi, syy woorschyynlig gaar käini richtige Baaselbieter. Sünscht hätte die gwüsst, as me «Für s Baaselbiet» – und nit «Für s Baselbiet« und «Für d Schwyz» – und nit «Für d Schwiz» schrybt. Halt ebe richtigs Baaselbieterdütsch. Aber allwääg gits halt schon en Underschiid zwüsche rächte und richtige Baaselbieter.
vergelschtered = verstört
Schwiz = Neubaselbieterdeutsch (Wahrscheinlich stammt diese Wortschöpfung vom Plakatmacher der SVP, der ja kein Hiesiger ist)
