Underäinisch luege dii alli schreeg aa. Numme will de no nie an äim vo dene ville Wienechtsmäärt gsii bisch. S chunnt diir e chlyy voor, wie wenn de d Rüd hättisch.
Efangs in jeedem Dorf, und syygs no so chläi, gits e son e Määrt. Buslaadige vo Wienechtsmäärtaagfrässene faaren in dr ganze Schyz ummen und chaufe chörbwyys sälberzoogeni Cherze, gflochteni Ääföichränz, gschnitzti Holzditti oder sünscht öbbis Handwäärchligs. Au myy Frau goot hüür wiider nöimen an son e wienächtlige Määrt. Derbyy häi miir scho drei Baar gstrickti Bettsoggen und föif ghööggleti Haafedätzli dehäi. Iich hoff numme, as sii nit underäinisch no uf d Ydee chunnt uuf Peru an e Wienechtsmäärt zgoo. Mii dunkts, iich gsuch allwääg zimmlig blööd uus, in sonere sälbergstrickte Lamachappe.
Haafedätzli = Topflappen
Ääföi = Efeu
