Häärtöpfelstock

No isch nid alles verloore. S git no rooserooti Zäichen am Himmel, oder besser gsäit im Düpfi, as d Äärte noonig am Undergoo isch. Und syygs numme bim Häärtöpfelstock. Heerlig. Es gits sen also no, die chlyyne, gastronomische Wunder.
Doo stand iich do letschti imene groosse Laaden an dr Kassen aa und voor miir byyged en elteri Frau – nääben anderem – drüü Päckli Häärtöpfel ufs Band. D Jumpfere hinder dr Kasse frogt: «Soo, Frau XY, gits hütte Zoobe Gschwellti?» D Frau mit de Häärtöpfel luegt d Kassiereren erstuunt aa und säit: «Näi. Iich mach früsche Häärtöpfelstock! Mit Anke, Nyydel und Muschgednuss. Nit z pflüttrig und au käi Betong. Soo, as d Groosschinder chönnen e Muelte für d Soossen in Stock mache.» Und jetz chunnt daas, won iich nie erwaarted hätti. Doo säit nämmlig die jungi Frau hinder dr Kasse. doo häig sii doch letschti dehäi für äinisch iire Liebschte Päcklihäärtöpfelstock gmacht. Häig äxtra non e chlyy mee Anke dryy gmacht. Aber mäinet diir, die häige daas gässe. Ummsverwoorgge nit. Syy häige dranumme gmänggeled und schnääderfreesig doo. Siider mach sii dr Stock wiider nummen no früsch. Nundefaane, han iich dänkt. No ischs Oobeland nit verloore. Ämmel soo lang, as no jungi Fraue git, wo dr Häärtöpfelstock säälber mache. In de mäischte Chochheftli wird äim jo duraane preediget, as s Choche hütt mues gschnäll goo. Es mues alles lyycht und billig syy. Joo nit zvill Zyt in der Chuchi verblämperle. Derbyy sett doch daas, wo me dehäi uuf e Disch bringt, guet und chüschtig syy. Nit son e billige Schnällfraass. Choche hed nämmlig mit Liebi z due. Aber daas isch halt son e Sach mit dr Liebi. Liebi hätte die ville, überlaschtete Frauen und Manne scho no. Aber ebe halt käi Zyt. Drum schläipfe sii Fertigpizza häi und fueren iiri Chinder drmit. Guet, wüsse die arme Frauen und Manne nit immer, waas doo bin e Däil Pizza zum Byschpiil für Chees druff isch. Gstudierti häi nämmlig uusegfunde, wie men ooni Milch cha Cheese mache. Und scho glyy isch dr «Analogkäse» erfunde gsii. Chees, wo gaar käin isch, au nit dernoo uusgseet und, am Wichtigschte, gaar nüt nach Chees schmeckt. Beduurenswärt syy jetz aber nit öbbe die, wo settige Bschiss uusdüftle. Beduure mues me mit deene haa, wo soo öbbis chaufen und no mäine, syy häigen öbbis Gschyyds boschted. Dehäi chöie denn d Chinder uf Gummi ummen und häis Gfüel, syy ässe Chees. Wenn die arme Goofe denn aber äinisch richtige Chees zum Ässen überchömme, spöie sii dä Schniifel wiider uusen und sääge: Daas cha me jo nit ässe, das schmeckt jo nach … ämmel nit nach Chees.
Aber no isch, wie gsäit, nit alles verloore. Wenn s nämmlig no Kassiererinne git, wo dr Häärtöpfelstock früsch mache, gits no Hoffnig.
In däm Sinn. Näämed wiider äinisch dr Spaarscheller füren und mached e richtige Stock – äin mit Häärtöpfel.