Miir häi jo immer e chlyy s Gfühl, miir, d Baasler und Baaselbieter, syyge fascht e chlyy vergässe vom Räscht vo dr Schwyz. Wien es Chind im Chindsgi, wo niemer mitem will spiile und won elläi imenen Egge mues mit de Bouchchlötzli Dürmli boue. E chlyy verschüpft halt. Soo bin iich miir letschti voorchoo, won iich z Aarau uf e Schnällzuug nach Baasel gwardet haa. Zerscht syy drei Züg duuregfrözd, won e rächti Gattig gmacht häi. So noobli Doppelstockzüg. Denn isch myy Zug choo, besser gsäit aanegschliche. Mit eneren alte Loki und schyttere, dräckige Wääge. Bim Aablick vo deere verlottereden und roschtige «Zugskomposition», wo ganz gwüss no vom vorhäärige Joorhundert isch, han iich nuume dänkt: Wenn dr Räscht vo dr Schwyz glyych über öis dänkt wie dä, wo die „Komposition“ uusgsuecht hed, denn Guetnacht am Zwölfi.
duurefröze = schnell durchfahren
schytter = schäbig
