S goot nidsi

Bii de Römer hed me gsee, wos aanefüert. Nummen no im Zügs ummeglääge. In Milch baaded und dr Chaare lo schlyffe. Underäinisch syy sii fascht uusgstorbe gsii. Aber numme fascht. S hed jo bekanntlig Italiäner druus gee. An daas han ich am letschte Welloobummel vo dr Männerriigi müesse dänke. Näi. Italiäner heds käini drbyy ghaa.
Es hed harmloos aagfange. E stattligi Tschuppele Weeloofaarer syy uuf em Gmäiniblatz baraat gstande. Me hed allergattig Drooteesel gsee. Modäärni mit allem drum und draa. E chlyy ölteri, aber nit soo alt, as syy no Rossbolleschaaber as Brääms ghaa hätte. Joo. Denn heds no zwee ghaa, die syy mit so nöimodische «Flyer», aso mit emene Weeloo mit Batterie, e chlyy nääbenuss gstande. Halt fascht wien e chlyy im «Offside», waas jo guet zum «Flyer» basst. Doo syy mir wiider d Römer in Sinn choo. E Männerriigi mit «Flyer»? Daas isch der Aafang vom Ändi. Jetz goots nidsi, han ich dänkt. Bii ältere Mönsche, wo nümme so mööge, chaa me jo no verstoo, as me soon e Göppel chauft. Aber doch nit bi junge Durner, wo no voll im Saft syy. Jä nu soo denn!
Denn syy miir loosgfaare. Süferlig, nit wie Söi in e Rüebacher. Me hed non e chlyy greeedet mitenand, bis noodisnoo de mäischte dr Schnuf uusgangen isch. S isch ämmel immer rüeiger worde. Wos denn dr erscht chlyy Hüübel uufegangen isch, hed gaar niemer me gschwätzt. Usser – prezyys – die zwee Warmduscher uf iire Weeloo mit Hilfsmotoor. S dumm Sprütze weer jo no gange. Was äim vill mee z schaffe macht, nääben em Uufechniempe, isch das unverschämmte Grinsen und Zänne vo deene zwee, wo sii nääbeduure gschnützt syy. Öis isch der Schwäiss in d Auge gloffe und die zwee häi dryygluegt wie zwöi früsch baadeti Buschi. Soo, han ich dänkt und haa an myym Göppel e Gang hööcher gschalted, jetz duen ich aber deene beede Sunndigsfaarer d Hüener yy. Schyssebyppi. Die häi äifach öbbis an dr Schaltig drüllt und syy soo no schnäller dr Hüübel duruuf. S schlimmscht isch aber, as s Grinse vo deene zwee non es Spüürli müpfiger worden isch. Wenn iich gnueg Schnuuf ghaa hätti, hätti iich deene Beckirandschwimmer die wüeschtischte Schlötterlig hinde nooche brüelt.
Am Ziel denn, d Batterie-Weelööler ooni e Schwäissdropfen und dr Räscht verschwitzt und pflätschnass, heds für alli zerscht emool es Bier gee. Und dir glaubeds nit, au die zwee «Flyer»-Piloote häi es Bier gstämmt. As öbb sii au Weellogfaare weere. Derbyy hätt deenen allwääg e Kamilletee besser doo. Won iich so in Bierschuum gstieret haa, han iich mir afo überlegge, wie daas ächt wyttergoot. Wenn nämmlig alsfott mee Wegglibuebe, alli mitemene Hilfsmotoor am Weeloo, chömme cho durne, mache mir dänk glyy numme no Ap und Noo, Gummi-Twist, Hüpfistäi, Hüügerliziggis oder sünscht öbbis Überzwäärchs in dr Durnstund. Aber noo isch s jo nit sowytt. Iich sääg öich dorum gäärn, was e bstandene Durner zu deene zwee Wäichäier gsäit hed: «Welloofaare mit Hilfsmotoor isch wie Schwimme mit Flüügeli».
Won er rächt hed, hed er rächt.